İranın xarici işlər naziri Abbas Əraqçi yaponiyalı həmkarı Toşimitsu Motegi ilə telefon danışığı zamanı Yaxın Şərqdəki gərginliyin aradan qaldırılması yollarını müzakirə edib. Əraqçi bildirib ki, Birləşmiş Ştatların İslamabad Memorandumu üzrə öhdəliklərinə qayıtması regionda sabitliyin bərpasına kömək edə bilər.
İran Xarici İşlər Nazirliyinin yaydığı bəyanata əsasən, Əraqçi deyib: “Münaqişənin həlli yolu sadədir. Amerika tərəfinin öz öhdəliklərini yerinə yetirməyə qayıtması və İslamabadın anlaşma memorandumu çərçivəsində imzaladığı şərtlərə əməl etməsi normal həyata qayıtmaq üçün lazımi şəraiti yaradacaq”.
Danışıqlar zamanı iranlı diplomat, həmçinin İran və Oman arasında Hörmüz boğazındakı gəmiçiliklə bağlı aparılan məsləhətləşmələrin son mərhələyə çatdığını vurğulayıb. Əraqçinin sözlərinə görə, ticarət gəmilərinin boğazdan təhlükəsiz keçidini təmin edəcək müvəqqəti dəniz marşrutunun müəyyənləşdirilməsi istiqamətində əhəmiyyətli irəliləyişlər əldə olunub.
İzmedia.az
