Xorvatiya millisinin baş məşqçisi Zlatko Dalić ötən həftə sonu Pamplonada Ante Budimirin oyununu canlı izlədiyini və 34 yaşlı hücumçunun milli komanda üçün vacib fiqur olduğunu bildirib.
Daliç Pamplonaya ilk səfərindən və Osasunanın Real Madrid üzərində 2:1 hesablı qələbəsini izləməkdən məmnun qaldığını deyib. Həmin görüşdə Budimir 36-cı dəqiqədə penaltidən vurduğu qolla komandasına üstünlük qazandırıb.
İspaniya klubunun sosial şəbəkələrində yayımlanan video müsahibədə Daliç Budimir barədə yüksək fikirlər səsləndirib: “Ante, ilk növbədə, əla insandır. O, ciddi və peşəkardır. Karyerası ərzində çoxlu qol vurub və bütün bunları zəhməti ilə qazanıb”.
Budimir bu mövsüm İspaniya çempionatında 27 oyunda 14 qol vurub. Daliç ümid etdiyini bildirib ki, hücumçu həm klubunda, həm də milli komandada qol vurmağa davam edəcək: “Bizə o lazımdır”.
Baş məşqçi vurğulayıb ki, Budimir sona qədər mübarizə aparan, cəsarətli və səbirli futbolçudur və komandanı daha güclü edir.
Daliç Dünya Kuboku öncəsi nikbin olduğunu da qeyd edib. Xorvatiya son iki mundialda ikinci və üçüncü yerləri tutub və məşqçi bu uğuru yenidən təkrarlamağın mümkün olduğunu düşünür. Onun sözlərinə görə, yeni nəsil formalaşsa da, Budimir, Luka Modrić və Ivan Perišić kimi təcrübəli oyunçular komandanın əsas gücüdür.
Xorvatiya Dünya Kubokunda İngiltərə, Panama və Qana ilə eyni qrupda mübarizə aparacaq. Turnir 11 iyun – 19 iyul tarixlərində keçiriləcək. Daliç bildirib ki, heyət İspaniya, Fransa və ya Portuqaliya qədər geniş olmasa da, komanda ürəklə oynayır və məhz bu amil onların əsas üstünlüyüdür.
İzmedia.az
