İndoneziyanın Yoqyakarta şəhərində yerləşən Kiçik Areşa adlı uşaq bağçasında uşaqlara qarşı zorakılıq iddiaları ölkədə böyük qalmaqala səbəb olub. BBC-nin məlumatına görə, polis basqını nəticəsində onlarla uşağın zorakılığa və laqeydliyə məruz qaldığı üzə çıxıb.
Hadisə bir keçmiş işçinin polisə verdiyi məlumatdan sonra araşdırılıb. Basqın zamanı əlləri və ayaqları bağlı, bəzi hallarda isə xəsarət almış uşaqlar aşkar edilib. Polis həmçinin təxminən 3 kvadratmetr ölçülü dar otaqlarda 20-yə qədər uşağın saxlandığını bildirib.
Rəsmilərin açıqlamasına görə, ümumilikdə 103 uşaq bağçaya qəbul olunub, onlardan ən azı 53-nün fiziki zorakılıq və ya laqeydliyə məruz qaldığı ehtimal edilir. Uşaqların əksəriyyəti iki yaşdan kiçikdir.
13 nəfər həbs edilib
Yogyakarta polisi bağçanın direktoru, fond rəhbəri və əməkdaşlar daxil olmaqla 13 nəfəri uşaqlara qarşı cinayətlərdə ittiham edərək həbs edib. Ümumilikdə 30 nəfər dindirilib. Mərkəzin rəsmi fəaliyyət icazəsinin olmadığı da müəyyən edilib.
Valideynlərin şoku
Valideynlər bildirirlər ki, bağça yüksək səviyyəli xidmət və müasir şərait vəd edirdi. Lakin sonradan uşaqlarda izah olunmayan xəsarətlər və davranış dəyişiklikləri müşahidə edilib.
Bəzi valideynlər uşaqların daim ac evə qayıtdığını, digərləri isə bədənlərində göyərmə və kəsiklər gördüklərini deyiblər. İşçilər isə bu halları ya “evdə baş verib”, ya da “digər uşaqlar tərəfindən dişlənmə” kimi izah ediblər.
Rəsmilərdən reaksiya
Şəhər meri Hasto Vardoyo bütün uşaq bağçalarının yoxlanılacağını və valideynlərin daha diqqətli seçim etməsi üçün maarifləndirmə aparılacağını bildirib. Yerli qanunvericilər isə hadisəni “bağışlanmaz” adlandıraraq tam araşdırma tələb ediblər.
Hadisə ölkədə uşaq baxım mərkəzlərinin nəzarət və lisenziya sisteminin yenidən gündəmə gəlməsinə səbəb olub.
İzmedia.az
