“Arsenal” Çempionlar Liqasının yarımfinalında “Atletiko Madrid”lə 1:1 hesablı heç-heçədən bir neçə saat əvvəl UEFA-ya təcili müraciət edib. Bu barədə Goal.com məlumat yayıb.
Bildirilir ki, London klubu İspaniya təmsilçisinin “Estadio Metropolitano” stadionunda oyunlara təsir göstərmək üçün “taktiki üsullardan” istifadə edə biləcəyi ilə bağlı narahatlığını UEFA-ya çatdırıb.
“Topçular” meydança yoxlaması tələb edib
“Arsenal” Madriddə keçiriləcək mühüm Avropa oyunundan öncə UEFA-dan rəsmi meydança yoxlaması aparılmasını xahiş edib. Bu addım komanda tərəfindən yüksək gərginlik və hazırlıq səviyyəsi kimi qiymətləndirilir.
Jurnalist Guillem Balague-nin məlumatına görə, oyunöncəsi baxış zamanı “Arsenal” nümayəndələri meydançanın vəziyyətindən narazı qalıb. Onların xüsusilə ot örtüyünün normadan hündür ola biləcəyi ilə bağlı şübhələri UEFA-ya çatdırılıb və ölçmələrin aparılması istənilib.
UEFA-nın meydançanın qaydalara uyğunluğunu yoxlayıb-yoxlamadığı barədə rəsmi məlumat isə hələlik açıqlanmayıb.
İzmedia.az
