“Ukrainska Pravda” qəzetinin məlumatına görə, Rusiyanın Krivoy Roq şəhərinə həyata keçirdiyi hücum nəticəsində iki nəfər həyatını itirib, 9 aylıq körpə isə ağır yaralanıb.
Krivoy Roq Müdafiə Şurasının rəhbəri Oleksandr Vilkul bildirib ki, “Şahed” tipli pilotsuz uçuş aparatı birbaşa yaşayış evinə düşüb və nəticədə yanğın baş verib. Hadisə zamanı 43 yaşlı kişi və 65 yaşlı qadın həlak olub. Yanğın daha sonra söndürülüb.
Vilkulun sözlərinə görə, ağır yaralanan 9 aylıq qızın ayağı amputasiya edilib. Körpə təcili olaraq xəstəxanaya çatdırılıb və ona bütün zəruri tibbi yardım göstərilir.
Sinelnikovo rayonuna da hücum edilib
Dnepropetrovsk Vilayət Hərbi Administrasiyasının rəhbəri Aleksandr Hanza Sinelnikovo rayonunun Duboviki kəndinə də hücum edildiyini açıqlayıb. Bildirilib ki, əraziyə hava bombaları atılıb.
Hücum nəticəsində 37, 48 və 51 yaşlı üç kişi yaralanıb. Onlara tibbi yardım göstərildiyi qeyd olunub.
İzmedia.az
