“Reuters” agentliyinin məlumatına görə, avstraliyalı milyarder Gina Rinehart qlobal geosiyasi gərginliklərin və strateji aktivlərə marağın artması fonunda “Hancock Prospecting” şirkətinin investisiya portfelini yenidən quraraq ABŞ-ın müdafiə sektoruna yatırımlarını genişləndirib.
Məlumata əsasən, Avstraliyanın ən varlı qadınına məxsus şirkət müdafiə sənayesi, qızıl və nadir torpaq metalları sektorlarında mövqelərini gücləndirmək üçün ABŞ portfelinin yenidən balanslaşdırılmasına təxminən 133 milyon dollar xərcləyib. Portfelin ümumi həcminin 3,3 milyard dollar olduğu bildirilir.
Mart ayında şirkətin CrowdStrike, L3Harris, Lockheed Martin, Northrop Grumman və RTX kimi ABŞ-ın aparıcı müdafiə şirkətlərində pay əldə etdiyi qeyd olunur. Eyni zamanda, qızıl hasilatçısı Newmont da portfelə daxil edilib.
Bundan əlavə, “Hancock Prospecting” nadir torpaq metalları sektorunda fəaliyyət göstərən “Rare Earths Americas” şirkətində 6,3 faiz pay alıb. Şirkətin mis hasilatçısı Hudbay Minerals-dakı payını təxminən 10 faiz artırdığı, lakin Çilinin litium istehsalçısı SQM-dəki investisiyasını tamamilə satdığı bildirilir.
Məlumata görə, şirkətin ən böyük investisiyaları texnologiya fondu Invesco QQQ Trust və ABŞ-ın “MP Materials” nadir torpaq şirkətində cəmlənib və bu aktivlər birlikdə portfelin təxminən yarısını təşkil edir.
İzmedia.az
