Kuba prezidenti Migel Diaz-Kanel ABŞ hakimiyyətinin Kuba Kommunist Partiyasının keçmiş lideri Raul Kastroya qarşı irəli sürdüyü ittihamların hüquqi əsası olmadığını və siyasi məqsəd daşıdığını bildirib.
O, X sosial şəbəkəsində yazıb ki, bu addım “heç bir hüquqi əsası olmayan siyasi aktdır” və onun sözlərinə görə, “uydurma işi” gücləndirməyə, həmçinin Kubaya təzyiqi əsaslandırmağa xidmət edir.
Diaz-Kanel ABŞ-ı 1996-cı ildə Kuba hərbçilərinin “Hermanos en Rescate” təşkilatına məxsus iki təyyarəni vurması ilə bağlı faktları təhrif etməkdə də ittiham edib. Onun sözlərinə görə, həmin dövrdə Kuba tərəfinin hərəkətləri beynəlxalq hüquqa uyğun olub və “qanuni özünümüdafiə” kimi qiymətləndirilməlidir.
Bundan əvvəl ABŞ Ədliyyə Nazirliyi Raul Kastro və daha beş nəfəri 1996-cı ildə iki təyyarənin vurulması ilə bağlı ABŞ vətəndaşlarının qətli və sui-qəsd ittihamları ilə rəsmi şəkildə ittiham edib.
İzmedia.az
