CNN xəbər verir ki, ABŞ-da inflyasiya aprel ayında İranla müharibədən sonra yaranan neft şoku nəticəsində yanacaq qiymətlərinin kəskin artması fonunda yenidən sürətlənib.
ABŞ Ticarət Nazirliyinin məlumatına görə, Federal Ehtiyat Sisteminin üstünlük verdiyi inflyasiya göstəricisi olan PCE (şəxsi istehlak xərcləri) indeksi illik müqayisədə 3,5%-dən 3,8%-ə yüksəlib.
Aylıq artım isə mart ayındakı 0,7%-dən sonra 0,4%-ə qədər yavaşlasa da, yanacaq, elektrik enerjisi, ərzaq və mənzil kimi əsas xərclər ev təsərrüfatlarına təzyiqi artırmaqda davam edir.
Məlumata görə, amerikalıların sərəncamında qalan gəlirləri azalıb, əmanət nisbəti isə 2,6%-ə düşərək son dörd ilin ən aşağı səviyyəsinə yaxınlaşıb. Bir çox ailələrin artan xərcləri qarşılamaq üçün yığımlarına müraciət etdiyi bildirilir.
İqtisadçı Keti Bostjançiç qeyd edib ki, ev təsərrüfatları yüksək inflyasiyanın təzyiqini daha güclü hiss etməyə başlayıb və qiymət artımı istehlak davranışına birbaşa təsir göstərir.
Aprel ayında real sərəncamda olan gəlirin 0,5% azalması, istehlak xərclərinin isə cəmi 0,1% artması iqtisadi aktivliyin demək olar ki, dayanmasına işarə edir.
Ekspertlər inflyasiyanın əsas səbəbi kimi Hörmüz boğazı üzərindən neft və qaz tədarükündəki fasilələrdən qaynaqlanan enerji qiymətlərinin artımını göstərirlər. Bu vəziyyət təkcə yanacaq deyil, həm də qida və sənaye məhsulları daxil olmaqla geniş təchizat zəncirinə təsir edir.
“NerdWallet” iqtisadçısı Elizabeth Renter bildirib ki, neft şoku, tarif siyasəti və idxal mallarında qiymət artımı inflyasiyanı daha da gücləndirir.
Əsas inflyasiya (yanacaq və ərzaq istisna olmaqla) illik təxminən 3,3% səviyyəsində qalır ki, bu da Federal Ehtiyat Sisteminin 2% hədəfindən xeyli yüksəkdir.
Analitiklər hesab edirlər ki, inflyasiya təzyiqi davam etdiyi üçün Federal Ehtiyat Sisteminin faiz dərəcələrini yaxın dövrdə dəyişməz saxlama ehtimalı yüksəkdir.
İzmedia.az
