Dünya Kubokuna hazırlıq mərhələsini başa vuran Xorvatiya millisi Belçika və Sloveniya ilə iki yoldaşlıq görüşü keçirib. Zlatko Daliçin rəhbərlik etdiyi komanda bu gün ABŞ-a yola düşərək 17 iyun saat 22:00-da İngiltərə ilə keçiriləcək ilk oyun üçün hazırlıqlara başlayacaq.
Məlumata görə, Xorvatiya son iki yoldaşlıq matçında həm üç, həm də dörd müdafiəçili taktiki sxemləri sınaqdan keçirib. Lakin Daliç İngiltərə kimi güclü rəqibə qarşı daha çox 3-4-2-1 və ya üç müdafiəçili sistemdən istifadə etməyi planlaşdırır.
Livakoviç qapıda dəyişməzdir
Qapı mövqeyində Dominik Livakoviçin yeri şübhə doğurmur. O, səsvermədə 92 faiz səs toplayaraq start heyətində yerini qoruyub. Futbolçu Sloveniya ilə son yoldaşlıq görüşündə bir neçə kritik seyvlə komandasını xilas edib və əsas qapıçı statusunu möhkəmləndirib.
Müdafiə xətti: üçlük sistemə üstünlük
Üç müdafiəçili sistemdə əsas namizədlər kimi Yoşko Qvardiol (96%), Luka Vuškoviç (85%) və Joşip Şutalo (58%) ön plana çıxıb.
Qanadlarda isə İvan Perişiç (85%) solda, Joşip Stanişiç (70%) isə sağda ən güclü seçim kimi göstərilir. Bu mövqe həm müdafiə, həm də hücum balansı tələb edir.
Yarımmüdafiə və Modriçin rolu
İki mərkəz yarımmüdafiəçisi ilə oynayacaq Xorvatiyada əsas diqqət Luka Modriçə yönəlib. 41 yaşlı futbolçu zədədən sonra meydanlara qayıdır və 92 faiz səs toplayaraq heyətdə yerini qoruyub.
Onun yanında isə Petar Suçiç 86 faiz səs toplayaraq Mateo Kovaçiçi (22%) geridə qoyub. Kovaçiç zədə səbəbindən mövsümün böyük hissəsini buraxdığı üçün start heyətindən kənarda qalıb.
Hücum xətti: Baturina və Paşaliç ön planda
İki “10 nömrə” mövqeyində Martin Baturina (76%) və Mario Paşaliç (35%) əsas namizədlərdir. Andrey Kramariç isə 29 faiz səs toplayaraq bu mərhələdə geridə qalıb.
Hücumçu seçimi: Budimir favoritdir
Hücum xəttində isə Ante Budimir 55 faiz səs toplayaraq ən güclü seçim kimi göstərilib. Təcrübəli forvard İspaniyanın “Osasuna” klubunda göstərdiyi performansla diqqət çəkir.
Beləliklə, Daliçin İngiltərə qarşısına çıxara biləcəyi potensial heyət artıq formalaşmaq üzrədir və Xorvatiya Mundiala ciddi hazırlıqla gedir.
İzmedia.az
