“The Wall Street Journal” (WSJ) və “The New York Times” (NYT) qəzetlərinin məlumatlı mənbələrinə istinadən verdiyi xəbərə görə, ABŞ Prezidenti Donald Tramp Mərkəzi Kəşfiyyat İdarəsinin (MKİ) direktoru Con Retkliffi məxfi missiya ilə şəxsən Moskvaya göndərib. Bildirilir ki, Ağ Ev rəhbəri bu səfər barədə bir çox yüksək rütbəli hərbi komandirləri və köməkçilərini əvvəlcədən bilgiləndirməyib.
Retkliff avqustun 25-də ABŞ Hərbi Hava Qüvvələrinə məxsus təyyarə ilə gözlənilmədən Vnukovo hava limanına enib. Kremlin mətbuat xidməti və Xarici Kəşfiyyat Xidmətinin (XKX) rəhbəri Sergey Narışkin sonradan görüşü təsdiqləyərək, kəşfiyyat orqanlarının səlahiyyətlərinə aid məsələlərin müzakirə olunduğunu bildiriblər.
Görüşlərin təfərrüatları və müzakirə olunan əsas mövzular:
-
FSB rəhbəri ilə görüş və Ukrayna məsələsi: NYT-nin məlumatına görə, Retkliff Moskvada Federal Təhlükəsizlik Xidmətinin (FSB) rəhbəri Aleksandr Bortnikovla görüşüb. MKİ rəhbəri cəbhədəki vəziyyəti “tutqun” qiymətləndirərək, Rusiyanın hərbi və iqtisadi imkanları daha da zəifləmədən müharibəni dayandırmaq üçün razılığa gəlməyin vacibliyini qeyd edib. O, Rusiyaya gəlməzdən öncə Ukrayna tərəfilə də təmasda olub.
-
NATO və İran Xəbərdarlığı: WSJ və “Politico” yazır ki, Retkliff Rusiya tərəfini NATO ölkələrinə, xüsusilə də həmsərhəd olan Baltikyanı dövlətlərə (Estoniya, Latviya, Litva) qarşı hər hansı təcavüzdən çəkinməyə çağırıb. Həmçinin Moskvanın İrana hərbi və iqtisadi dəstəyini dayandırması tələb olunub.
ABŞ Prezidenti Donald Tramp bu səfəri “adi işgüzar görüş” kimi qiymətləndirsə də, Vaşinqtona qayıdan MKİ direktoru Ağ Evdə Pentaqon rəhbəri Pit Heqset və Birləşmiş Qərargah Rəisləri Komitəsinin sədri general Den Keynin iştirakı ilə 3 saata yaxın davam edən qapalı toplantı keçirib.
İzmedia.az
