Nepalda baş verən dağıdıcı daşqınlar və palçıq sürüşmələri nəticəsində ölkənin su elektrik stansiyalarında (SES) böhranlı vəziyyət yaranıb. “Reuters” agentliyinin Nepalın Milli Fəlakət Risklərinin Azaldılması və İdarəetmə Orqanına istinadən verdiyi məlumata görə, bu kimi obyektlərdə ən azı 933 işçi itkin düşmüş hesab olunur.
Fəlakət anında yüzlərlə inşaatçı və mütəxəssisin fəaliyyət göstərən və ya tikintisi davam edən SES-lərin tunellərində betonlama işləri apardığı bildirilir. Trişuli çayı hövzəsində təbii fəlakət nəticəsində ən azı 14 su elektrik stansiyası ciddi zədələnib və ya tamamilə sıradan çıxıb. Ölkənin ümumi elektrik enerjisi istehsalının 12 faizindən çoxunu təşkil edən təxminən 430 MVt gücündə generasiya qabiliyyəti dayandırılıb.
Ən kritik vəziyyət “Yuxarı Trişuli-3A” SES-də qeydə alınıb. Xilasedicilər tunelin ön hissəsini deşərək içeridə sıxılıb qalan işçilərə hava vurmağa başlayıblar. Lakin tunellərin qalın qaya və palçıq təbəqəsi altında qalması, eləcə də sel sularının giriş platformalarını dağıtması axtarış-xilasetmə əməliyyatlarını həddindən artıq mürəkkəbləşdirir.
Milli Fəlakətlərin İdarə Edilməsi İdarəsinin (NDMA) son hesabatına əsasən, ölkənin şimal rayonlarını bürüyən fəlakətdə həlak olanların sayısı 903 nəfərə çatıb, 10 mindən çox insan isə xilas edilib. Hələ də 592 əcnəbi daxil olmaqla, təxminən 4 200 nəfərin taleyindən xəbər yoxdur.
Xatırladaq ki, təbii fəlakət avqustun 26-da Çinlə sərhəd yaxınlığında baş verən torpaq sürüşməsi və buzlaq uçqunu nəticəsində yaranıb. Böyük sürətlə çay yatağı boyu 70 kilometrdən çox məsafə qət edən palçıq və qaya axını yolüstü yaşayış məntəqələrini və infrastrukturu yerlə-yeksan edib.
İzmedia.az
