“Journal of Information Technology Education: Research” jurnalında dərc olunan yeni tədqiqata görə, generativ süni intellektin (Sİ) təhsil sisteminə sürətlə inteqrasiya olunmasına baxmayaraq, onun kiçikyaşlı məktəblilərin tənqidi düşüncə və müstəqil problem həll etmə bacarıqlarına təsiri hələ də yetərincə öyrənilməyib. Norveç və Çexiya alimlərinin 2022–2025-ci illər arasında dərc edilən 173 elmi məqaləni təhlil edərək gəldiyi qənaətə görə, mövcud araşdırmaların 80%-i uşaqlar deyil, tələbələr arasında aparılıb.
Tədqiqat göstərir ki, süni intellekt texnologiyalarının təsiri onun istifadə formasına görə dəyişir. Çatbotlar şagirdlər tərəfindən sual formalaşdırmaq, faktları yoxlamaq və müqayisə aparmaq üçün istifadə edildikdə tənqidi düşüncəni inkişaf etdirir. Lakin hazır cavab almaq üçün alətə çevrildikdə informasiyanın səthi mənimsənilməsinə və müstəqil analitik bacarıqların zəifləməsinə yol açır.
Ekspertlər xəbərdarlıq edirlər ki, uşaqların axtarış sistemlərindən istifadə vərdişləri də dəyişir. Norveç Media Təşkilatının göstəricilərinə əsasən, 9–18 yaşlı uşaqlar arasında “Google” axtarış sistemindən istifadə göstəricisi 2024-cü ildəki 72%-dən 2026-cı ildə 47%-ə düşüb. Mütəxəssislər bildirirlər ki, məktəblərin əsas vəzifəsi təkcə yeni texnologiyaları öyrətmək deyil, uşaqlarda “Sİ-savadlılığı” formalaşdırmaq və əsas zehni yükün alqoritmlər tərəfindən deyil, şagirdin özü tərəfindən icra olunduğu təlim tapşırıqları yaratmaqdır.
İzmedia.az
