“Politico” qəzetinin məlumatına görə, ABŞ Konqresində bir sıra nüfuzlu Respublikaçı Partiya üzvləri Prezident Donald Trampı İranla mümkün sülh razılaşmasının tələsik və ABŞ üçün əlverişsiz şərtlərlə bağlanmaması barədə xəbərdar ediblər.
Məqalədə qeyd olunur ki, Trampın İranla sazişə nail olmaq cəhdləri “Respublikaçı şahinlər” adlandırılan bir qrup konqresmeni narahat edir. Onlar hesab edirlər ki, zəif razılaşma İranı regionda təhlükə yaratmaq və Hörmüz boğazında dəniz ticarətini məhdudlaşdırmaq imkanları ilə saxlaya bilər.
“Politico” yazır ki, əsas mübahisə mövzuları İranın nüvə proqramının gələcəyi, yüksək zənginləşdirilmiş uran ehtiyatları və Hörmüz boğazı vasitəsilə dəniz tranzitinin təmin olunması ilə bağlıdır.
Nəşrin məlumatına görə, bəzi respublikaçılar administrasiyanı danışıqlardan imtina etməyə və İrana təzyiqi davam etdirməyə çağırır. Bu mövqeni müdafiə edənlər arasında Senatın Silahlı Qüvvələr Komitəsinin sədri Rocer Viker və senator Tom Tillis də yer alır.
Eyni zamanda, Tillis ABŞ hökumətinin İranla mümkün razılaşma ilə bağlı hələ də izah edilməli çoxlu məqamlarının olduğunu bildirib.
Qeyd olunur ki, ABŞ və İsrail 28 fevralda İrana qarşı hərbi əməliyyata başlayıb, 7 apreldə Tramp iki həftəlik atəşkəs elan edib və daha sonra müxtəlif raundlarda danışıqlar aparılıb. Lakin tərəflər uzunmüddətli razılaşma üzrə yekun nəticəyə gələ bilməyib.
İzmedia.az
