“Focus Online” xəbər portalının hökumətin “Yaşıllar” Partiyasının sorğusuna verdiyi cavaba istinadən yaydığı məlumata görə, Almaniya hökuməti 2026-cı ildə səlahiyyətli nümayəndələrinin, koordinatorlarının fəaliyyəti və işçi heyəti üçün təxminən 89 milyon avro xərcləməyi planlaşdırır.
Hələ 2024-cü ildə, Olaf Şoltsun rəhbərlik etdiyi əvvəlki hökumət dövründə səlahiyyətli nümayəndələrə ayrılan xərclər təxminən 69 milyon avro təşkil edirdi. Bununla yanaşı, həmin ilin oktyabr ayında seçki kampaniyası zamanı hazırkı kansler Fridrix Merts hökumətdə səlahiyyətli nümayəndələr institutunu tamamilə ləğv etmək niyyətində olduğunu bəyan etmişdi.
O, həmin dövrdə Xristian Demokrat İttifaqı/Xristian Sosial Birliyi partiyalar blokunun qurultayında çıxışı zamanı “Dövlət aparatı azaldılmalıdır” demişdi. Merts Berlin ofislərində şişirdilmiş bürokratiyanın mövcud olduğunu və səlahiyyətli nümayəndələrin “əslində həll edə bildiklərindən daha çox problem yaratdıqlarını” iddia etmişdi.
Xristian Demokrat İttifaqı/Xristian Sosial Birliyi ilə Almaniya Sosial Demokrat Partiyası arasında imzalanmış koalisiya müqaviləsində səlahiyyətli nümayəndələrin sayının yarıya endirilməsi nəzərdə tutulur. Hazırda onların sayı 24 nəfərdir. Halbuki, 2024-cü ilin yanvar ayında Olaf Şolts hökuməti dövründə bu rəqəm 43 idi.
Beləliklə, səlahiyyətli nümayəndələrin sayı yarıya endirilsə də, onların fəaliyyəti üçün nəzərdə tutulan xərclər təxminən üçdə bir artıb.
İzmedia.az
