Məşhur müğənni Madonna Nyu-Yorkun Times Meydanında verdiyi konsert zamanı təhlükəli hərəkəti ilə pərəstişkarlarını narahat edib.
67 yaşlı sənətçi LGBTQ+ icmasına yönəlmiş tanışlıq tətbiqi Grindr tərəfindən təşkil olunan sürpriz “Pride” konsertində çıxış edib. Konsert üçün qurulan səhnə tamaşaçıların xeyli üzərində yerləşdirilib.
Çıxış zamanı səhnənin kənarında təhlükəsizlik məqsədilə quraşdırılmış şəffaf qoruyucu məhəccər olsa da, Madonna bir ayağını maneənin üzərindən keçirərək riskli hərəkət edib. Canlı yayım zamanı müğənninin qismən səhnədə, qismən isə məhəccərin üzərindən asılı vəziyyətdə olduğu görüntülər sosial şəbəkələrdə geniş müzakirələrə səbəb olub.
Pərəstişkarlar dərhal sosial şəbəkələrdə reaksiyalarını bölüşüblər. Bir istifadəçi yazıb ki, Madonna məhəccərin üzərindən əyiləndə ona “Madonna, yox, bunu etmə!” deyə qışqırıb. Digər izləyicilər isə “Ölümdən qorxdum”, “Bu məni çox əsəbiləşdirdi” və “Nənə, yox!” kimi şərhlər paylaşıblar.
Konsert zamanı Madonna çəhrayı və mavi rəngli korset, eləcə də dizdən yuxarı çəkmələr geyinib. O, yeni albomu “Confessions II”dən bir neçə mahnı ifa edib. Proqrama “I Feel So Free”, “Bring Your Love”, “Love Sensation”, “Get Together”, “I Love New York” və “Hung Up” mahnıları daxil olub.
Səhnədə müğənnini rəqqaslar müşayiət edib. Arxa fonda isə LGBTQ+ hüquqları hərəkatının tarixini əks etdirən arxiv fotolar nümayiş olunub.
Konsertdə Madonnaya uzun illərdir əməkdaşlıq etdiyi britaniyalı DJ və prodüser Stüart Prays də qoşulub. O, 2005-ci ildə işıq üzü görən Confessions on a Dance Floor albomundan etibarən Madonna ilə birlikdə çalışır.
Məlumata görə, Stüart Prays iyulun 3-də təqdim olunacağı gözlənilən “Confessions II” albomunun da prodüseridir.
İzmedia.az
