Rusiya Xarici İşlər Nazirliyi telefon danışığından sonra açıqlayıb ki, Rusiyanın xarici işlər naziri Sergey Lavrov və Türkiyənin xarici işlər naziri Hakan Fidan İran ətrafındakı böhranın tez bir zamanda azaldılması və strateji Rusiya–Türkiyə enerji layihələrinin təhlükəsiz fəaliyyətinin təmin olunmasının vacibliyini müzakirə ediblər.
İzmedia.az xəbər verir ki, nazirliyin bəyanatında bildirilib ki, tərəflər ikitərəfli gündəliyin aktual məsələlərinə toxunaraq, strateji enerji layihələrinin sabit və fasiləsiz işləməsi üçün zəruri şəraitin yaradılmasının əhəmiyyətini vurğulayıblar. Xüsusilə, Kiyev rejiminin Mavi Axın qaz kəməri və Türk Axını qaz kəməri infrastrukturuna zərər vurmaq cəhdləri fonunda bu boru kəmərlərinin hərtərəfli mühafizəsinin vacibliyinə diqqət yetirilib.
Məlumata görə, nazirlər İran ətrafındakı vəziyyətlə bağlı da fikir mübadiləsi aparıblar. Rusiya tərəfi İsrail və ABŞ tərəfindən İrana qarşı həyata keçirilən hücumlar nəticəsində yaranmış böhranın tezliklə deeskalasiyasının zəruriliyini vurğulayıb və siyasi-diplomatik üsullara üstünlük verildiyini qeyd edib. Həmçinin bildirilib ki, Rusiya regionda gərginliyin azaldılması məqsədilə Türkiyə də daxil olmaqla tərəfdaşlarla səyləri əlaqələndirməyə hazırdır.
Bəyanatda İslam Əməkdaşlıq Təşkilatı çərçivəsində çoxtərəfli əməkdaşlıq məsələlərinə də toxunulduğu qeyd olunub. Sergey Lavrov bu platformada müxtəlif mövzular üzrə müzakirələr zamanı balanslı və obyektiv yanaşmanın vacibliyini vurğulayıb.
Sonda tərəflərin ən yüksək səviyyədə konstruktiv və qarşılıqlı faydalı ikitərəfli əlaqələri davam etdirmək niyyətini təsdiqlədiyi bildirilib.
İzmedia.az
