Meksikanın Təhlükəsizlik və Vətəndaşların Müdafiəsi Katibliyinin məlumatına görə, ölkədəki Teotihuacan arxeoloji ərazisində baş verən atışma nəticəsində yaralananların sayı 13-ə çatıb.
Qurumun X sosial şəbəkəsində yayımladığı açıqlamada bildirilir: “Teotihuacanda baş verən faciəli hadisələrdən sonra bölgədəki xəstəxanalarda müalicə alan müxtəlif millətlərdən olan 13 nəfərin daşınması üçün təcili yardım və qurumlararası koordinasiya protokolları dərhal işə salınıb”.
Rəsmi məlumata əsasən, xəsarət alanlar arasında Kolumbiya, Kanada, Rusiya, Braziliya və ABŞ-dan olan turistlər var. Yaralıların yaşı 6-dan 61-ə qədər dəyişir.
Daha əvvəl səlahiyyətli orqanların yaydığı məlumata görə, naməlum şəxs Teotihuacan arxeoloji kompleksində atəş açdıqdan sonra intihar edib. Hücum nəticəsində bir kanadalı qadın həlak olub. Hadisədən sonra Meksika Prezidenti Klaudiya Şeynbaum hərtərəfli araşdırma aparılması barədə göstəriş verib, həmçinin qurbanlara və onların ailələrinə bütün zəruri yardımın göstərilməsini tapşırıb.
İzmedia.az
