ABŞ Prezidenti Donald Tramp İranın ABŞ ilə dialoqu davam etdirəcəyinə əminliyini bildirib.
“Onlar danışıqlar aparacaqlar. Əgər bunu etməsələr, əvvəllər heç vaxt görmədikləri problemlərlə qarşılaşacaqlar”, – deyə o, radio aparıcısı Con Frederikə verdiyi müsahibədə bildirib. Tramp əlavə edib: “Ümid edirəm ki, ədalətli bir razılaşma əldə edəcəklər və ölkələrini yenidən quracaqlar, amma bunu etdikdə nüvə silahlarına sahib olmayacaqlar. <…> Biz buna yol verə bilmərik”, – deyə Amerika lideri vurğulayıb.
Bazar ertəsi İran Parlamentinin sədri Məhəmməd Bağır Qalibaf bildirib ki, Vaşinqton İslam Respublikasını təhdid etməyə davam edərsə, İran ABŞ-la danışıqlar aparmayacaq. O, həmçinin ölkəsinin “döyüş meydanında yeni güc balansı nümayiş etdirməyə hazır olduğunu” qeyd edib və bununla bağlı hazırlıqların “son iki həftədir” aparıldığını bildirib.
Məlumata görə, ABŞ və İsrail 28 fevralda İrana qarşı genişmiqyaslı əməliyyata başlayıblar. 7 apreldə ABŞ İranla iki həftəlik atəşkəs elan edib. İran və ABŞ 11 apreldə İslamabadda bir neçə danışıqlar raundu keçiriblər. İran nümayəndə heyətinə Qalibaf, ABŞ nümayəndə heyətinə isə vitse-prezident Cey Di Vens rəhbərlik edib.
Hər iki tərəf danışıqlardan sonra bildirib ki, mövcud fikir ayrılıqları səbəbindən münaqişənin uzunmüddətli həlli ilə bağlı razılaşma əldə olunmayıb. Vaşinqton danışıqlar qrupunu yenidən Pakistana göndərmək niyyətində olduğunu bildirsə də, növbəti raundun dəqiq tarixinin olub-olmayacağı hələlik məlum deyil. Məlumata əsasən, danışıqların 21 apreldə baş tutma ehtimalı var.
İzmedia.az
