Abbas Əraqçi Rusiyaya səfəri zamanı bildirib ki, İran və Rusiya həmişə geniş məsələlər üzrə məsləhətləşmələr aparıblar.
“Gördüyünüz kimi, biz həmişə Rusiya ilə geniş məsələlər, xüsusən də regional məsələlər üzrə sıx məsləhətləşmələr aparmışıq və daim ikitərəfli danışıqlar keçirmişik”, – deyə o, Telegram kanalında paylaşdığı videoda bildirib.
Bundan əlavə, İranın yüksək vəzifəli diplomatı Pakistanla danışıqların son mərhələsini uğurlu adlandırıb.
“Pakistandakı dostlarımızla yaxşı məsləhətləşmələr apardıq. Səfər uğurlu keçdi. Son görüşlərimizin nəticələrini qiymətləndirdik və danışıqların hansı istiqamətdə, hansı şərtlər altında davam edə biləcəyini müzakirə etdik”, – deyə Əraqçi qeyd edib.
O, həmçinin Omanda keçirdiyi məsləhətləşmələrdən də danışıb.
“Oman bizə yaxın olan dost ölkədir, müharibədə çox yaxşı mövqe tutub. Biz və Oman Hörmüz boğazının iki sahil dövlətik. Buna görə də bu məsələ ilə bağlı məsləhətləşmələr aparmalı idik. Gəmilərin boğazdan təhlükəsiz keçməsi vacib qlobal məsələdir. Boğaza nəzarət edən iki ölkə olaraq, qarşılıqlı maraqlarımızı təmin etmək üçün biz və Oman sıx əlaqələndirməni davam etdirməliyik”, – deyə İranın xarici işlər naziri əlavə edib.
İzmedia.az
