Politico mənbələrə istinadən xəbər verir ki, ABŞ-İran qarşıdurması Avropa İttifaqı üçün iqtisadi şokdan siyasi böhrana çevrilmə riski yaradıb və Avropa liderləri artan təzyiq hiss edirlər.
Nəşrin məlumatına görə, enerji qiymətlərinin artması və iqtisadi inkişafın yavaşlaması fonunda Aİ hökumətləri çətinliklə idarə edə biləcəkləri böhrana hazırlaşırlar. Bildirilir ki, bu vəziyyət blokun onsuz da zəifləyən siyasi dayaqlarını sarsıda bilər.
Seamus Boland bildirib ki, enerji xərclərinin artması qida, nəqliyyat və mənzil sektorlarına zəncirvari təsir göstərir və ən çox aşağı və orta gəlirli ailələr zərər görür.
Boland qeyd edib ki, siyasi baxımdan bu vəziyyət həm milli hökumətlərə, həm də Avropa institutlarının vətəndaşları xarici şoklardan qorumaq qabiliyyətinə inamsızlıq yaradır. Onun sözlərinə görə, bu, daha çox proteksionist və daxilə yönəlmiş siyasətə dəstəyi sürətləndirə bilər.
Valdis Dombrovskis isə bildirib ki, Hörmüz boğazının blokadasının nəticələri artıq daha aydın görünür və geniş iqtisadiyyata təsir göstərir. O əlavə edib ki, maliyyə imkanları COVID-19 pandemiyası və ilk enerji böhranından sonra daha məhdudlaşıb.
Dombrovskis daha əvvəl Aİ ölkələrinin staqflyasiya — yüksək inflyasiya, aşağı ÜDM artımı və işsizliklə üzləşə biləcəyi barədə xəbərdarlıq etmişdi.
Yenilənmiş Avropa İttifaqı iqtisadi proqnozunun may ayında açıqlanacağı gözlənilir. ABŞ və İsrailin İrana qarşı hərbi əməliyyatlarından əvvəl Avropa Komissiyası 2026-cı il üçün ÜDM artımını 1,4 faiz, inflyasiyanı isə 2 faiz səviyyəsində proqnozlaşdırmışdı.
Son hesablamalara görə, enerji qiymətləri 2026-cı ilin sonuna qədər müharibədən əvvəlki səviyyələrə qayıdarsa, ÜDM artımı mövcud proqnozdan ən çoxu 0,4 faiz bəndi aşağı olacaq. Neft və qaz qiymətləri yüksək səviyyədə qalarsa, Aİ iqtisadiyyatı bu il 0,8 faizdən çox artmayacaq. Birinci ssenaridə inflyasiya 3 faiz, ikinci ssenaridə isə 4,5 faiz proqnozlaşdırılır.
İzmedia.az
