ABŞ prezidenti Donald Tramp İranla telefon vasitəsilə danışıqların aparıldığını bildirib.
izmedia.az xəbər verir ki, Tramp Ağ Evdə jurnalistlərə verdiyi açıqlamada İranla davam edən danışıqlara münasibət bildirib.
İranla müzakirələrin davam etdiyini bildirən Prezident Tramp deyib: “Artıq hər dəfə sənəd görmək üçün 18 saatlıq uçuşlar etmirik. Danışıqları telefonla aparırıq”.
Tramp üzbəüz danışıqlara üstünlük verdiyini bir daha təkrarlayıb və əlavə edib ki, hər hansı potensial razılaşma İranın nüvə silahı ambisiyalarından tamamilə imtina etməsindən asılıdır.
ABŞ və İran arasında 8 apreldə əldə edilən atəşkəs razılaşmasından və Pakistanın vasitəçiliyi ilə aparılan danışıqların nəticə verməməsindən sonra Prezident Donald Tramp 13 apreldə İrana qarşı “dəniz blokadası” tətbiq etmək qərarına gəlib və Hörmüz boğazına daxil olan və çıxan İranla əlaqəli gəmilərin ələ keçirilməsinə başlanılıb.
Bu proses zamanı ABŞ Oman körfəzində və Hind okeanında bir neçə İran ticarət gəmisinə hücum edərək onları ələ keçirib. İran isə Hörmüz boğazı yaxınlığında bir neçə gəmini ələ keçirərək cavab verib ki, bunlardan biri İsraillə əlaqəli olub.
