Böyük Britaniyanın Baş naziri Keir Starmerin ofisi bildirib ki, ölkə Ukraynanın müdafiə sənayesinin dəstəklənməsi üçün nəzərdə tutulan 90 milyard avroluq Avropa kredit təşəbbüsünə qoşulmaqla bağlı danışıqlara başlayacaq.
Baş nazirin ofisinin Avropa Siyasi Birliyinin (EPC) sammitindən əvvəl yaydığı açıqlamada qeyd olunub ki, Keir Starmer Yerevanda keçiriləcək sammitdə Böyük Britaniyanın Ukraynanın həyati əhəmiyyətli hərbi texnika ilə təmin olunması üçün Avropa İttifaqı ilə əməkdaşlığı gücləndirmək niyyətini vurğulayacaq.
Açıqlamaya əsasən, Ukrayna üçün əlavə maliyyələşdirmə Britaniya şirkətləri üçün də yeni imkanlar yarada və ölkənin təcili ehtiyaclarının qarşılanmasına töhfə verə bilər. Bu addım Böyük Britaniya ilə Avropa İttifaqı arasında münasibətlərin dərinləşdirilməsi istiqamətində “əhəmiyyətli mərhələ” kimi qiymətləndirilib.
Eyni zamanda, Baş nazirin ofisi Moskvanın hərbi imkanlarını zəiflətməyə yönəlmiş Rusiya şirkətlərinə qarşı yeni sanksiyaların bu həftə elan ediləcəyini də bildirib.
Qeyd edək ki, 4 mayda Ermənistanın paytaxtı İrəvanda keçiriləcək EPC sammitində Starmer iştirak edəcək. O, Yerevana səfər edən ikinci Böyük Britaniya baş naziri olacaq. Bundan əvvəl bu ölkəyə rəsmi səfər 1990-cı ildə Marqaret Tetçer tərəfindən həyata keçirilmişdi.
İzmedia.az
