İzmedia.az xəbər verir ki, iyunun 21-də keçirilməsi planlaşdırılan Qaqauziya Xalq Məclisinə seçkilər rəsmi şəkildə ləğv edilib. Yerli parlament sədrinin müavini Georgi Leyçunun sözlərinə görə, Moldova hakimiyyəti ilə yaranmış hüquqi qarşıdurma səbəbindən səsverməni nəzərdə tutulan tarixdə keçirmək texniki baxımdan mümkün olmayıb.
Spiker bildirib ki, hətta Kişinyov tərəfindən tətbiq olunan məhdudiyyətlər dərhal aradan qaldırılsa belə, seçkilərin təşkili üçün tələb olunan müddət artıq itirilib.
Münaqişənin əsas səbəbi 2024-cü ilin əvvəlində Moldovada qəbul edilən və muxtariyyətin daxili seçki proseslərinə təsir göstərən yeni seçki qanunvericiliyi dəyişiklikləri olub.
Vəziyyət Moldova Ədliyyə Nazirliyinin Konstitusiya Məhkəməsi vasitəsilə regionun hüquq-mühafizə orqanlarının rəhbərləri və digər vəzifəli şəxslərin təyin olunması səlahiyyətlərinə etiraz etməsindən sonra daha da gərginləşib.
Bununla yanaşı, Qaqauziya hakimiyyətinin seçkilərə hazırlıqla bağlı qərarları da ümumi yurisdiksiya məhkəmələri tərəfindən bloklanıb.
