ABŞ Prezidenti Donald Tramp bildirib ki, İranla davam edən münaqişəyə son qoymaq üçün razılaşma əldə edilməsinə çalışılır və müharibə “tezliklə bitə bilər”. Onun sözlərinə görə, istənilən yeni saziş İranın uranın zənginləşdirilməsi və nüvə silahı əldə etməsinin qarşısının alınmasını əsas hədəf kimi əhatə etməlidir.
Trampın açıqlamasına görə, yeni razılaşma ABŞ-ın onun ilk prezidentlik dövründə imzaladığı 2015-ci il nüvə sazişindən daha sərt və daha geniş formatlı olmalıdır. Xatırladaq ki, həmin saziş Barak Obamanın dövründə əldə olunmuş və İranın uran zənginləşdirməsini 15 il müddətinə məhdudlaşdırmasını nəzərdə tutmuşdu.
Hərbi analitik Maykl Klark isə vəziyyəti şərh edərək bildirib ki, Vaşinqton hazırda çətin seçim qarşısındadır və münaqişədən çıxış yolu axtarır.
“ABŞ-ın məqsədi 2015-ci il sazişindən daha yaxşı kimi təqdim edilə biləcək bir çıxış forması tapmaqdır”, – deyə o bildirib.
Onun fikrincə, yeni saziş mahiyyət etibarilə əvvəlkinə bənzəyəcək, lakin şərtləri daha sərt ola bilər, çünki İranın siyasi rəhbərliyi daha sərt mövqe nümayiş etdirir.
Klark həmçinin qeyd edib ki, İranın Hörmüz boğazı üzərində təsir imkanları artıb və bu, qlobal enerji və ticarət axınlarına ciddi risk yaradır. Onun sözlərinə görə, Tehran boğazda hərəkəti məhdudlaşdırmaq gücünə malik olduğunu anlayır və bu amil beynəlxalq təzyiq vasitəsi kimi istifadə oluna bilər.
Analitik əlavə edib ki, İranın nüvə infrastrukturuna vurulan zərbələr bərpa üçün illər tələb edə bilər, lakin bu, tam təhlükəsizlik təminatı demək deyil. Onun fikrincə, gələcəkdə İranın Rusiya və ya Şimali Koreya kimi ölkələrdən texnoloji dəstək alması riski qalır.
Klark yekunda vurğulayıb ki, Trampın münaqişəni tezliklə bitmiş elan etmək istəyi ABŞ-ın regiondan sürətli geri çəkilməsi kimi riskli ssenarilərə yol aça bilər.
İzmedia.az
