izmedia.az xəbər verir ki, alimlər papua pinqvinlərinin əslində bir deyil, dörd ayrı növdən ibarət olduğunu müəyyən ediblər.
Beynəlxalq tədqiqat qrupu genom analizi, morfoloji məlumatlar və iqlim modelləşdirməsi əsasında Cənub okeanında yaşayan Pygoscelis papua pinqvinlərini araşdırıb. Nəticədə onların şimal, cənub, cənub-şərq və şərq olmaqla dörd fərqli təkamül xəttinə ayrıldığı məlum olub.
Araşdırma zamanı pinqvinlərin yalnız DNT səviyyəsində deyil, həm də fizioloji xüsusiyyətlərinə görə fərqləndiyi üzə çıxıb. Alimlər onların istilik tənzimlənməsi, oksigen daşıması, maddələr mübadiləsi və skelet inkişafı ilə bağlı genlərində ciddi fərqlər aşkar ediblər.
Mütəxəssislərin fikrincə, Antarktika qütb cəbhəsi pinqvin populyasiyalarını bir-birindən ayıraraq onların min illərlə ayrı şəkildə inkişaf etməsinə səbəb olub.
Tədqiqatçılar artıq papua pinqvinlərinin dörd ayrı növ kimi rəsmi şəkildə tanınmasını təklif ediblər. Alimlər həmçinin xəbərdarlıq edirlər ki, qlobal istiləşmə yaxın onilliklərdə bu növlərdən üçünün yaşayış məkanını ciddi şəkildə azalda bilər.
