İspaniyanın “Melia Hotels International” otel qrupu çərşənbə günü Kubadakı 15 oteldə idarəetmə, marketinq və brend xidmətlərinin göstərilməsini dərhal dayandırdığını açıqlayıb. Şirkət bu qərarı adadakı geosiyasi, hüquqi və iqtisadi vəziyyətin pisləşməsi ilə əlaqələndirib.
Reuters agentliyinin məlumatına görə, qərar ABŞ Prezidenti Donald Tramp administrasiyasının Kubaya təzyiqləri artırması, yanacaq embarqosu tətbiq etməsi və ölkənin resurslarını məhdudlaşdırmaq məqsədilə sanksiyaları sərtləşdirməsi fonunda qəbul edilib.
Kubada fəaliyyət göstərən ən böyük xarici otel operatorlarından biri olan “Melia Hotels International” 1990-cı ildən bəri adada geniş fəaliyyət göstərir. Şirkət rəhbərliyi bildirib ki, qərarla bağlı otel sahiblərinə mayın 26-da məlumat verilib, rəsmi təsdiq isə çərşənbə günü açıqlanıb. Həmin otellər şirkətin Portuqaliyadakı törəmə müəssisəsi olan Ilha Bela Gestao E Turismo tərəfindən idarə olunurdu.
Şirkətin tənzimləyici orqanlara təqdim etdiyi rəsmi açıqlamada qeyd olunub ki, fəaliyyətdən çıxmaq qərarı “İlha Bela”nın nəzarətindən kənarda olan və əməliyyatların davamlılığına, qanuniliyinə və təhlükəsizliyinə ciddi təsir göstərən gözlənilməz amillərin məcmusu ilə bağlıdır.
Kuba otellərin sayına görə “Melia”nın ən böyük bazarlarından biri hesab olunsa da, ölkənin şirkətin ümumi maliyyə göstəricilərinə töhfəsi son illərdə əhəmiyyətli dərəcədə azalıb. Adanın turizm sektoru uzunmüddətli enerji çatışmazlığı və turist axınının azalması səbəbindən ciddi çətinliklərlə üzləşib.
Şirkət bildirib ki, sözügedən otellərin əksəriyyəti artıq bağlanıb və ya hazırda fəaliyyət göstərmir.
“Melia Hotels International” əlavə edib ki, Ilha Bela hazırda aktivlərdən çıxış prosesini nizamlı şəkildə həyata keçirmək üzərində işləyir və təchizatçılarla müştərilərin vaxtında məlumatlandırılması üçün müvafiq tədbirlər görür.
İzmedia.az
