izmedia.az xəbər verir ki, Rusiya Federasiyasının Xabarovsk diyarında meşə yanğınları səbəbindən güclü tüstü əmələ gəlib. Federal və regional avtomobil yollarında bəzi yerlərdə görünüş məsafəsi demək olar ki, sıfıra düşüb. Dövlət Yol Polisi sürücülərə təcili xəbərdarlıq edərək sürəti minimuma endirməyi və son dərəcə ehtiyatlı olmağı tövsiyə edib.
Sakinlərin və sürücülərin bildirdiyinə görə, bəzi ərazilərdə hərəkət çox çətinləşib, görünüş ciddi şəkildə məhdudlaşıb. Xabarovsk şəhərinin özü də tüstü ilə örtülüb, havada yanıq qoxusu hiss olunur və kül hissəcikləri düşür.
Məlumata əsasən, bölgədə eyni vaxtda bir neçə meşə yanğını qeydə alınıb və ümumi yanğın sahəsi yüzlərlə hektarı əhatə edir. Yanğınların söndürülməsi üçün işlər aparılır, lakin quru hava və güclü külək vəziyyəti daha da ağırlaşdırır.
Rəsmi qurumlar əhaliyə zərurət olmadıqca çölə çıxmamağı, pəncərələri bağlamağı və maska istifadəsini tövsiyə edir. Havanın keyfiyyəti xüsusi nəzarət altına alınıb.
