Seda-e Afghan Telegram kanalının məlumatına görə, Əfqanıstan və Pakistan qüvvələri arasında şiddətli döyüşlər cümə axşamı Durand xətti boyunca yenidən başlayıb və cümə səhəri də davam edib. Bu sərhəd xətti Əfqanıstan və Pakistan arasında yerləşir və Kabil tərəfindən tanınmır.
Məlumata əsasən, Pakistan qüvvələrinin artilleriya atəşinə cavab olaraq, Əfqanıstan İslam Əmirliyinin qüvvələri Xost və Paktia əyalətlərindən Durand xətti istiqamətində Pakistan mövqelərinə hücum edib.
Telegram kanalının yaydığı məlumatda ən azı üç Pakistan əsgərinin öldürüldüyü və bir neçə nəzarət məntəqəsinin məhv edildiyi bildirilir.
Əfqanıstan Ali Liderinin sözçü müavini Həmdullah Fitrat bildirib ki, Pakistan qüvvələri cümə axşamı axşam Kunar, Paktika və Xost əyalətlərinə intensiv minaatan və raket zərbələri endirib. Onun sözlərinə görə, hücumlarda dronlardan da istifadə olunub və mülki hədəflər vurulub.
“Alemarah” portalının yaydığı məlumata əsasən, Fitrat bildirib ki, nəticədə iki mülki şəxs həlak olub, 25 nəfər yaralanıb və yaralıların əksəriyyəti uşaqlardır.
Məlumata görə, Kunar əyalətinin Sarkano və Marawara rayonlarında kəndlərə yüzlərlə minaatan və artilleriya mərmisi atılıb, nəticədə yaralananlar və dağıntılar qeydə alınıb. Digər bölgələrdə də mülki şəxslər arasında itki və yaralanmaların olduğu bildirilir.
İzmedia.az
