Rusiya İstintaq Komitəsinin regional idarəsinin məlumatına görə, Rostov-Don şəhərində sirk tamaşası zamanı pələngin tamaşaçıların üzərinə tullandığını əks etdirən videolar yayıldıqdan sonra müstəntiqlər cinayət işi açıblar.
Daha əvvəl mediada pələngin çıxış zamanı qoruyucu məftil toru aşaraq tamaşaçıların olduğu hissəyə keçdiyini göstərən bir neçə video yayılmışdı.
Qurumdan bildirilib ki, aprelin 19-da sosial şəbəkələrdə yayılan məlumatlardan sonra dərhal araşdırmaya başlanılıb və nəticədə Rusiya Cinayət Məcəlləsinin 238-ci maddəsi (təhlükəsizlik tələblərinə cavab verməyən xidmətlərin göstərilməsi) ilə cinayət işi qaldırılıb.
İlkin məlumata görə, pələnglərin iştirak etdiyi çıxış zamanı arenanı əhatə edən qoruyucu tor sıradan çıxıb. Yırtıcılardan biri arenanı tərk edərək tamaşaçıların olduğu əraziyə daxil olub. Hadisə zamanı ziyarətçilər arasında xəsarət alan olmayıb. Pələng qısa müddətdə mütəxəssislər tərəfindən zərərsizləşdirilərək qəfəsinə qaytarılıb.
İstintaq çərçivəsində mütəxəssislər təhlükəli heyvanların iştirak etdiyi tamaşanın təşkilində təhlükəsizlik qaydalarına əməl olunub-olunmadığını araşdıracaqlar. Hüquq-mühafizə orqanları sirk rəhbərliyinin, əməkdaşların və şahidlərin dindiriləcəyini bildiriblər. Bundan əlavə, qoruyucu torun sıradan çıxmasının və heyvanın arenadan çıxmasının səbəblərini müəyyən etmək üçün ekspertizalar təyin olunub.
İzmedia.az
