Kubanın xarici işlər naziri Bruno Rodrigez Parrilla bildirib ki, əvvəllər Kubaya neft tədarük edən bütün təchizatçılar indi azad ticarət prinsiplərini pozaraq ABŞ-ın hədə-qorxuları və təhdidləri ilə üzləşirlər. O, həmçinin ABŞ dövlət katibi Marko Rubionun Kubaya qarşı neft blokadasının olmadığı barədə açıqlamalarını yalan adlandırıb.
Nazir “Telegram” kanalında yazıb: “Dörd ay ərzində Kubaya yalnız bir yanacaq partiyası gəlib. Bütün təchizatçılarımız azad ticarət və naviqasiya azadlığı prinsiplərini pozaraq hədə-qorxu və təhdidlərə məruz qalırlar”.
“Bir neçə saat əvvəl ABŞ dövlət katibi Kubaya qarşı neft blokadasının olmadığını dedi”, – deyə Rodrigez Parrilla bildirib və əlavə edib: “O, sadəcə yalan danışmağı seçdi. O, prezidentə və Ağ Evin mətbuat katibinə zidd mövqe tutur”.
Kuba xarici işlər naziri vurğulayıb ki, “reallıq danılmazdır”. Onun sözlərinə görə, “29 yanvar 2026-cı ildə ABŞ prezidenti Kubaya yanacaq ixrac ediləcəyi təqdirdə bütün ölkələri tariflərlə hədələyən sərəncam imzalayıb”. O, həmçinin ABŞ administrasiyasının Karib ölkəsinə yanacaq tədarük etməyi planlaşdıran ölkələrə qarşı enerji sektorunda ikinci dərəcəli sanksiyaların tətbiqi ilə bağlı 1 may tarixli yeni sərəncamını xatırladıb.
Rodrigez Parrilla bildirib ki, dövlət katibi prezidentə təklif etdiyi “neft blokadasının” Kuba xalqına vurduğu zərər və əzablardan tam xəbərdardır.
Daha əvvəl Kuba hakimiyyəti bəyan edib ki, ötən ilin dekabrından ABŞ-ın Venesueladan Kubaya gedən yanacaq tankerlərinin keçidini bloklamasından sonra ölkəyə heç bir neft tədarükü çatmayıb. Mart ayının sonunda Rusiya tankeri “Anatoli Kolodkin” Kubaya 100 min ton neft çatdıraraq ölkənin çətin enerji vəziyyətini xeyli yüngülləşdirib.
İzmedia.az
