“1 Mart işi”nin tam şəkildə üzə çıxdığını iddia edən Ermənistanın baş naziri Nikol Paşinyan bildirib ki, hüquq-mühafizə sistemi qruplaşmanın rəhbəri Robert Köçəryanı qanuni məsuliyyətə cəlb etməlidir. O, Köçəryanın (ölkənin keçmiş prezidenti, hazırda “Ermənistan” blokunun proporsional parlament namizədləri siyahısına rəhbərlik edir – red.) məhkəməyə verilməsini ayrıca məsələ kimi qiymətləndirib.
Paşinyan bu barədə 14 mayda seçkiqabağı kampaniya çərçivəsində, hazırda məzuniyyətdə olmasına baxmayaraq ölkəni idarə edən “Vətəndaş Müqaviləsi” partiyasının proporsional siyahısına rəhbərlik edən şəxs kimi çıxış edərkən bildirib.
Onun sözlərinə görə, bu məsələ həll olunmayana qədər hakimiyyət Ermənistanda ədalətli məhkəmə sisteminin mövcud olduğuna ictimaiyyəti inandıra bilməyəcək.
“Mənə qarşı ən böyük və cavab verməsi çox çətin olan ittiham budur: insanlar Robert Köçəryanın niyə azadlıqda olduğunu soruşurlar”, – deyə Paşinyan qeyd edib.
O, şəxsi məsələləri həll etmək üçün hakimiyyətə gəldiyi təəssüratını yarada biləcək şərhlərdən çəkinməyə çalışdığını, eyni zamanda onu şəxsən narahat edən mövzulardan mümkün qədər uzaq durmağa üstünlük verdiyini bildirib.
“Mən istəyirəm ki, məsələlər institusional səviyyədə həll olunsun. Bu, oliqarxik qruplardan başlayaraq ictimai məsələdir – onlar necə formalaşıblar, hərbi geyimlər necə paylanıb”, – deyə hakim partiyanın lideri əlavə edib.
Qeyd edək ki, Nikol Paşinyan bu gün İrəvanın Ajapnyak inzibati rayonunda seçki kampaniyası aparır.
İzmedia.az
