Ukrayna müharibənin başlanmasından bəri ilk dəfə olaraq Rusiya qüvvələrindən daha çox gündəlik hücum həyata keçirib ki, bu da döyüş meydanında dinamikanın dəyişməsi kimi qiymətləndirilir. Lakin bu barədə məlumatı açıqlayan Ukrayna Silahlı Qüvvələrinin baş komandanı Aleksandr Sırski Pokrovsk istiqamətində təxminən 100 min Rusiya əsgərinin toplanması və şimaldan, Belarusdan mümkün hücum ehtimalı barədə xəbərdarlıq edib.
“Militarniy” portalının məlumatına görə, Sırski müsahibəsində həmçinin kadr çatışmazlığının aradan qaldırılması üçün hərbi islahatların aparıldığını, yeni müqavilə sistemlərinin tətbiqini və hərbçilər üçün daha yüksək maaşların nəzərdə tutulduğunu açıqlayıb.
Ukrayna ilk dəfə hücum sayına görə Rusiyanı ötüb
Ukrayna Silahlı Qüvvələrinin baş komandanı Aleksandr Sırski bildirib ki, ordunun bütün cəbhə xətti boyunca əks-hücumları gücləndirilib və gündəlik hücum əməliyyatlarının sayına görə Ukrayna ilk dəfə Rusiya qüvvələrini ötüb.
Sırski bazar ertəsi “Militarniy” portalına müsahibəsində Rusiya döyüş əməliyyatlarının intensivliyinin və ümumi sayının azaldığını deyib:
“Məsələn, dünən hücum əməliyyatlarımızın sayının ilk dəfə olaraq düşmənin göstəricilərini keçməsi ilə yadda qaldı”, – deyə o bildirib və konkret tarix qeyd etməyib.
O, əlavə edib ki, vəziyyətə baxmayaraq, arxayınlaşmaq olmaz: “Düşmən güclüdür”.
İzmedia.az
