ABŞ Prezidenti Donald Trampın İranı Hörmüz boğazı üzərində Amerika hərbi helikopterini vurmaqda ittiham etməsindən sonra ABŞ ordusu İrana qarşı hərbi əməliyyatlara başlayıb.
ABŞ Mərkəzi Komandanlığının (CENTCOM) məlumatına görə, zərbələr çərşənbə axşamı ABŞ-ın Şərq vaxtı ilə saat 17:00-da (Böyük Britaniya vaxtı ilə saat 22:00) həyata keçirilib.
CENTCOM-un açıqlamasında bildirilir: “Bu missiya İranın əsassız təcavüzünə mütənasib cavabdır”.
“Axios”un ABŞ rəsmisinə istinadən yaydığı məlumata görə, ABŞ qüvvələri İranın bir neçə hava hücumundan müdafiə sistemi və radar obyektini hədəfə alıb.
Donald Tramp bildirib ki, İran bir gün əvvəl Hörmüz boğazında ABŞ-a məxsus “Apache” hücum helikopterini vurub.
ABŞ Prezidenti “Truth Social” platformasında paylaşdığı açıqlamada yazıb: “Möhtəşəm hərbçilərimiz mənə məlumat veriblər ki, iranlılar ötən gecə Hörmüz boğazında patrul xidməti həyata keçirən yüksək texnologiyalı ‘Apache’ helikopterlərimizdən birini vurublar. Helikopterdə olan hər iki pilot sağdır və xilas edilib. Lakin ABŞ bu hücuma cavab verməlidir”.
Tramp ABC News-a müsahibəsində İrana qarşı cavab zərbələrinin “çox güclü” olacağı barədə xəbərdarlıq edib.
“Biz hazırda cavab veririk. Bu, onların dünən gecə helikopterimizə qarşı həyata keçirdikləri hücuma cavabdır. Hesab edirəm ki, cavab çox güclü olmalıdır və məhz bunu edirik”, – deyə ABŞ Prezidenti vurğulayıb.
İranın xarici işlər naziri Abbas Əraqçi isə ABŞ-ın yeni hücumlarına münasibət bildirərək ölkəsinin geri çəkilməyəcəyini bəyan edib.
“Döyüş meydanındakı məğlubiyyətlərinə baxmayaraq, ABŞ bizim qətiyyətimizi sınamaq qərarına gəlib. Güclü silahlı qüvvələrimiz heç bir hücumu və ya təhdidi cavabsız qoymayacaq”, – deyə Əraqçi bildirib.
O əlavə edib: “Təhlükəsiz olmaq istəyirsinizsə, bölgəmizi tərk edin”.
Daha sonra “Tasnim” agentliyi İslam İnqilabı Keşikçiləri Korpusunun (İİKK) bölgədəki ABŞ hədəflərinə raket və pilotsuz uçuş aparatları ilə zərbələr endirdiyi barədə məlumat yayıb.
“The New York Times” anonim mənbələrə istinadən yazıb ki, ABŞ vaxtı ilə bazar ertəsi axşamı Hörmüz boğazında bir “Apache” helikopteri qəzaya uğrayıb. Donald Tramp sonradan hadisəni təsdiqləsə də, nə Ağ Ev, nə də qəzet helikopterin hansı səbəbdən qəzaya uğradığını açıqlayıb.
İran rəsmi şəkildə ABŞ helikopterinin İran qüvvələri tərəfindən vurulduğunu təsdiqləməyib. Bununla belə, Trampın açıqlamasından qısa müddət sonra Abbas Əraqçi xarici hərbi qüvvələri Hörmüz boğazını və ətraf əraziləri tərk etməyə çağırıb.
Əraqçi X sosial şəbəkəsində yazıb: “Hörmüz boğazı beynəlxalq sular deyil, İran və Omanın birgə yurisdiksiyası altındadır. Ərazimizin yaxınlığında yerləşən xarici qüvvələr insan səhvləri, qəza və ya çarpaz atəş riskləri ilə üz-üzədir”.
Nazir əlavə edib ki, “bu riskləri azaltmağın ən yaxşı yolu bölgəni tərk etməkdir”.
Trampın paylaşımından əvvəl CENTCOM Fars körfəzində qəzaya uğrayan “Apache” helikopterinin iki pilotunun uğurla xilas edildiyini açıqlamışdı.
Komandanlığın sözçüsü BBC-yə bildirib ki, pilotlar Bəhreyndə yerləşən ABŞ Hərbi Dəniz Qüvvələrinin 59-cu Xüsusi Tapşırıq Qrupuna məxsus pilotsuz dəniz sistemi vasitəsilə sudan çıxarılıb.
Məlumata görə, pilotsuz vasitə pilotları təhlükəsiz əraziyə çatdırıb, daha sonra onlar başqa bir helikopter vasitəsilə təxliyə olunublar.
İzmedia.az
