İran Prezidenti Məsud Pezeşkiyan xalqa müraciətində Tehranın milli maraqların qorunması üçün dialoqa hər zaman açıq olduğunu, lakin xarici təzyiqlər qarşısında ölkənin suverenliyindən və müdafiə gücündən heç vaxt güzəştə getməyəcəyini bəyan edib. “Tasnim” agentliyinin məlumatına görə, dövlət başçısı müharibənin İran tərəfindən başlamadığını və diplomatik addımların yalnız eskalasiyanın qarşısını almaq məqsədi taşıdığını vurğulayıb.
Prezidentin bəyanatından əsas məqamlar:
-
Müdafiə və diplomatiya parallelliyi: Pezeşkiyan bildirib ki, diplomatiya və hərbi güc bir-birinə zidd deyil. İran hərbi potensialının ləğvi tələblərinə qətiyyətlə qarşı çıxacaq və düşmənlərin ölkəni özünü müdafiə qabiliyyətindən məhrum edərək Qəzza zolağındakı vəziyyətə salmasına imkan verməyəcək.
-
Daxili birlik və iddiaların təkzibi: Hökumət, Ali Rəhbərlik və Silahlı Qüvvələr arasında fikir ayrılıqlarının olması barədə xəbərləri təkzib edən prezident, bütün qərarların milli təhlükəsizlik orqanları ilə tam koordinasiyalı şəkildə qəbul edildiyini diqqətə çatdırıb.
-
Hörmüz boğazı və regional münasibətlər: Pezeşkiyan xatırladıb ki, İran qonşu ölkələrlə dinc yanaşı yaşamaq tərəfdarıdır. Hörmüz boğazından gəmilərin İranın qaydalarına uyğun keçməsinə razılıq verildiyini qeyd edən dövlət başçısı, qarşı tərəfi də üzərinə düşən öhdəlikləri yerinə yetirməyə çağırıb.
-
Qərbə və daxili nifaq cəhdlərinə xəbərdarlıq: Avropa ölkələrini müstəqil mövqelərdən geri çəkilməkdə ittiham edən Pezeşkiyan, ABŞ və İsrailin Fars körfəzi ölkələrini İrana qarşı qaldırmaq cəhdlərinin qarşısının alınacağını vurğulayıb.
İzmedia.az
