Tayvanın Müdafiə Nazirliyi önümüzdəki altı il ərzində adanın silah və sursatla özünütəminat səviyyəsini əhəmiyyətli dərəcədə yüksəltməyi hədəfləyir. “Taipei Times” qəzetinin verdiyi məlumata görə, Müdafiə Nazirliyinin Silahlanma Bürosu (Ordnance Bureau) 2026–2032-ci illər arasında dörd əsas müdafiə müəssisəsinin modernize edilməsinə və istehsal gücünün artırılmasına 14,15 milyard yeni Tayvan dolları (təxminən 447,5 milyon ABŞ dolları) həcmində investisiya yönəldəcək.
Strateji layihə zirehli texnika, artilleriya, sursat, partlayıcı maddələr, optik avadanlıqlar, xüsusi batareyalar, habelə kimyəvi, bioloji, radioloji və nüvə müdafiə vasitələrinin yerli istehsalını əhatə edir. Qəbul edilmiş büdcə planına əsasən, 2026-cı ildə bu məqsədlər üçün ilk mərhələdə 328,8 milyon NTD (təxminən 10,4 milyon dollar) ayrılıb. Əsas maliyyələşmə piki isə 2028–2030-cu illərə təsadüf edəcək və bu dövrdə illik ayırmalar 4,13 milyard NTD-yə (130 milyon dollar) çatacaq.
Xatırladaq ki, Tayvan 1949-cu ildən — Çan Kayşinin rəhbərlik etdiyi Qomindan qüvvələrinin vətəndaş müharibəsində məğlub olaraq adaya çəkilməsindən bəri müstəqil administrasiya tərəfindən idarə olunur. Pekin isə Tayvanı Çin Xalq Respublikasının ayrılmaz ərazisi və öz əyaləti hesab edir.
İzmedia.az
