İran İslam Respublikası Ordusunun Baş komandanı general-mayor Əmir Hatəmi ölkə silahlı qüvvələrinin ABŞ və ya İsrail tərəfindən gələ biləcək hər hansı yeni hərbi müdaxiləyə qarşı tam döyüş hazırılığında və sayıq vəziyyətdə olduğunu bəyan edib.
Rəsmi dövlət mediasına müsahibəsində Hatəmi vurğulayıb ki, İran ordusu ölkənin müstəqilliyini, təhlükəsizliyini və ərazi bütövlüyünü müdafiə etməkdən bir an belə çəkinməyəcək. Baş komandan əlavə edib ki, silahlı qüvvələr bundan əvvəl də düşmən təcavüzünə qarşı ölkənin varlığını uğurla müdafiə edib və bu əzm dəyişməz olaraq qalır.
Bu bəyanat Yaxın Şərqdə davam edən münaqişə fonunda ABŞ-ın İrana yeni hərbi zərbələr endirmək ehtimalı ilə bağlı narahatlıqların pik həddə çatdığı bir vaxta təsadüf edir.
Əmir Hatəminin çıxışı ABŞ Prezidenti Donald Trampın İranla bağlı verdiyi sərt bəyanatlardan dərhal sonra gəlib. Tramp bazar günü verdiyi açıqlamada İran məsələsində “qərar qəbul etmə rejimində” olduğunu bildirib. O, masadakı seçimlər arasında hərbi yolla tam məhv etmə, iqtisadi təzyiqləri artırma və ya sülh sazişi bağlama variantlarının olduğunu qeyd edib. Bununla belə, ABŞ dövlət başçısı Nyu-Yorkda keçiriləcək BMT Baş Assambleyası çərçivəsində İran Prezidenti Məsud Pezeşkianla görüşə açıq olduğunu da istisna etməyib.
İzmedia.az
