Pakistanın Baş naziri Şehbaz Şərif BMT Baş Assambleyası çərçivəsində Avropa Şurasının Prezidenti Antonio Kosta və Avropa Komissiyasının Prezidenti Ursula fon der Leyen ilə üçtərəfli görüş keçirib. Aİ liderləri diplomatik səylərinə və regional sabitliyə verdiyi töhfələrə görə Pakistana minnətdarlıqlarını bildiriblər.
Görüşdən sonra sosial şəbəkə hesablarında paylaşım edən Aİ rəsmiləri Pakistanın ABŞ və İran arasındakı münaqişənin azaldılması, dialoqun bərpası və dinc həll yollarının tapılmasında mühüm vasitəçilik rolunu yüksək qiymətləndiriblər. Tərəflər regional təhlükəsizlik və sabitliyin təmin edilməsi üçün birgə fəaliyyətin davam etdiriləcəyini vurğulayıblar.
Pakistan Baş Nazirinin Ofisindən verilən bəyanatda isə tərəflərin qlobal siyasi prosesləri müzakirə etdiyi, mübahisələrin sülh, diplomatiya və beynəlxalq hüquq normaları çərçivəsində həllinin vacibliyini bir daha təsdiqlədikləri bildirilib.
İzmedia.az
