Yeni Zelandiya hökuməti Kanadanın təşəbbüsü ilə təsis edilən və NATO üzvü olan ölkələrin hərbi proqramlarını maliyyələşdirməyi hədəfləyən Müdafiə, Təhlükəsizlik və Sabitlik Bankına (DSRB) üzv olmaq təklifini rəsmi olaraq rədd edib. Bu barədə “Radio New Zealand” (RNZ) ölkənin Xarici İşlər Nazirliyinə istinadən məlumat yayıb.
Nazirliyin rəsmi bəyanatında qeyd olunub ki, müdafiə sektoru üçün xüsusi hərbi maliyyə mexanizminin yaradılmasındansa, mövcud bazar imkanlarının genişləndirilməsi daha səmərəli addımdır. Hesablamalara görə, banka daxil olmaq üçün tələb olunan ilkin ödəniş 56 milyon dollar təşkil edir və gələcəkdə bu xərclərin daha da artması riski var. Oktyabr ayında yayılan xəbərdə bildirilir ki, Vellington öz imtina qərarını hələ avqust ayının sonlarında Monreala çatdırıb. Şərqi Hind-Sakit okean regionunda yerləşən Yeni Zelandiyanın NATO üzvü olmadığını da qeyd etmək lazımdır.
134 milyard dollarlıq hərbi konsorsium
Mənzil-qərargahı Monrealda yerləşəcək Müdafiə, Təhlükəsizlik və Sabitlik Bankının (DSRB) ana məqsədi hərbi proqramların və silahlanmanın maliyyələşdirilməsi üçün qlobal bazarlardan 134 milyard dollara qədər vəsait cəlb etməkdir.
Banka təsisçi kimi qoşulmaq niyyətini artıq Kanada, Albaniya, Belçika, Yunanıstan, Latviya, Lüksemburq, Rumıniya, Türkiyə və Ukrayna bəyan ediblər.
İzmedia.az
