Fransanın Daxili İşlər Nazirliyinin veriyi və “Le Figaro” nəşrinin dərc etdiyi son məlumatlara əsasən, ölkə üzrə məktəblilərin kütləvi etiraz aksiyaları zamanı 504 nəfər hüquq-mühafizə orqanları tərəfindən saxlanılıb, iğtişaşlar zamanı isə 48 polis əməkdaşı müxtəlif dərəcəli xəsarətlər alıb. Departamentin hesablamalarına görə, nümayişlərdə ümumilikdə 71,5 min nəfər iştirak edib ki, onların 24,5 mini Paris şəhərinin payına düşüb. Birbaşa təhsil müəssisələrinin yaxınlığında keçirilən aksiyalara isə 55 minə yaxın etirazçı qatılıb.
Rəsmi qurumlar Parisin Bastiliya meydanında nümayişçilərin dağıdılması zamanı baş verən toqquşmanı istisna etməklə kütləvi aksiyaların nisbətən sakit keçdiyini bildirsələr də, dinc etirazlar fonunda şəhər zorakılığı və vandalizm hallarının kəskin artdığı qeydə alınıb. Puatye şəhərində orta məktəbdə törədilən yanğın müəllimin avtomobilinə keçib, Sent-Etyendə isə onlarla şəxs təhsil müəssisəsinə daxil olaraq yeməkxananı dağıdıb. Bayonnda məktəb əməkdaşının mənzilinin pəncərələri sındırılıb, müəllimlərə qarşı raket atıcılardan istifadə olunub. Tuluzada məktəb direktoru, Sen-Şamondakı təhsil ocağında isə direktor müavini üz nahiyəsindən ağır xəsarət alıb.
İğtişaşlar zamanı polis infrastrukturu da hədəfə alınıb: Strasburqda xidməti avtomobil yandırılıb, La Roşel və Bordo şəhərlərində polis məntəqələrinə hücum cəhdləri olub, Qleize şəhərində isə polis əməkdaşı ağır yaralanıb. Fransa Daxili İşlər Nazirliyinin rəhbəri təhsil müəssisələrinə güclə daxilolma və zorakılıq hallarını kəskin pisləyərək, asayişi bərpa edən polis əməkdaşlarına təşəkkürünü bildirib.
İzmedia.az
