ABŞ Konqresindəki hər iki partiyanın — Respublikaçılar və Demokratların təmsilçisi olan bir qrup senator Prezident Donald Trampı Rusiya dizel yanacağının idxalı ilə bağlı Vladimir Putinlə əldə etdiyi razılaşmadan imtina etməyə çağırıb. Bəyanatda vurğulanır ki, 2022-ci ildə qəbul edilmiş qanun Rusiya enerji resurslarının ölkəyə idxalını birmənalı şəkildə qadağan edir və bu embarqo yalnız Rusiya qoşunlarının Ukraynadan tam çıxarılması şərtilə ləğv edilə bilər. Respublikaçı senator Tom Tillis və digər qanunvericilər administrasiyanı Konqreslə məsləhətləşmədən qanunvericiliyi birbaşa pozmaqda və təcavüzkar Rusiyaya maliyyə dəstəyi verməkdə ittiham ediblər.
Ağ Ev narazılıqlara cavab olaraq Trampın elan etdiyi “enerji atəşkəsi” təşəbbüsünü əsas gətirsə də, Rusiya tərəfinin belə bir atəşkəsə razılıq verməsinə dair heç bir rəsmi təsdiq yoxdur. Ukrayna Prezident Administrasiyası və diplomatik mənbələr də Moskvanın bu razılaşmaya qoşulması haqqında məlumatsız olduqlarını bildiriblər. Ekspertlər qeyd edirlər ki, Konqresdəki ara seçkilər ərəfəsində Trampın bu addımı atmasına səbəb İranla 8 aydır davam edən müharibə nəticəsində ölkədə dizel yanacağının qiymətinin rekorda — qallon üçün 6,53 dollara çatmasıdır. Bununla belə, analitiklər mövsümi amillərə görə yay dizeli artıqlığı yaşayan Rusiyanın bu sövdələşmədə heç bir güzəştə getmədiyini və Rusiya yanacağının qlobal bazardakı böhranı həll etmək üçün yetərsiz olduğunu vurğulayırlar.
İzmedia.az
