Fransa paytaxtının Mərkəzi rayonunun meri Ariel Vayl Parisin mərkəzində (3-cü mikrorayonda) yerləşən və həm yerli sakinlər, həm də turistlər arasında son dərəcə populyar olan tarixi “Marché des Enfants Rouges” (“Qırmızı Uşaqlar Bazarı”) ərzaq bazarının gecə saatlarında baş verən güclü yanğın nəticəsində tamamilə məhv olduğunu bəyan edib. Şəhər yanğınsöndürmə xidmətinin çevik müdaxiləsi sayəsində alov ətraf tikililərə keçmədən lokallaşdırılsa da, bazarın taxta konstruksiyaları və qastronomik stendləri tamamilə yanaraq kül olub.
BFMTV telekanalının məlumatına görə, yanğın yerli vaxtla təxminən gecə saat 03:00 radələrində başlayıb. Hüquq-mühafizə orqanları və mütəxəssislər yanğının başvermə səbəblərini araşdırmağa başlayıblar. Qeyd edək ki, 1615-ci ildə Kral XIII Lüdovikin hakimiyyəti dövründə əsası qoyulan “Marché des Enfants Rouges” Parisin ən qədim örtülü ərzaq bazarı hesab olunurdu. Məkan öz adını yaxınlıqda yerləşən və yetimlərin qırmızı geyim geyindiyi tarixi uşaq evindən almışdı.
İzmedia.az
