Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnik TASS agentliyinə bildirib ki, son bir həftə ərzində Ukraynanın Rusiyanın müxtəlif bölgələrinə hücumları nəticəsində bir uşaq da daxil olmaqla 50-dən çox mülki şəxs həyatını itirib, təxminən 200 nəfər isə yaralanıb.
Miroşnikin sözlərinə görə, “Ukrayna qüvvələrinin hücumları ötən həftə ümumilikdə 250 mülki şəxsə təsir edib. Onlardan 20-si azyaşlı olmaqla 199 nəfər yaralanıb, biri azyaşlı olmaqla 51 nəfər həlak olub”.
O bildirib ki, itkilərin böyük hissəsi Luqansk və Donetsk Xalq Respublikalarında, eləcə də Belqorod və Zaporojye vilayətlərində qeydə alınıb.
Diplomat qeyd edib ki, dron hücumları nəticəsində 228 nəfər zərər çəkib ki, bu da ümumi itkilərin 91 faizini təşkil edir.
Miroşnik həmçinin iddia edib ki, Ukrayna qüvvələri beynəlxalq humanitar hüququ pozaraq tibbi nəqliyyat vasitələrini qəsdən hədəfə alıblar. Onun sözlərinə görə, Belqorod vilayətində magistral yolda FPV dronunun hücumu nəticəsində təcili yardım avtomobilinin sürücüsü yaralanıb.
Bundan əlavə, diplomat Ukrayna qüvvələrinin Rusiyanın müxtəlif bölgələrində uzaqdan minalama əməliyyatlarını davam etdirdiyini bildirib.
Miroşnik əlavə edib: “Belqorod vilayətində həkimlər Voznesenovka kəndində partlayıcı qurğunun üzərinə basdıqdan sonra hər iki ayağını itirən mülki şəxsin həyatını xilas edə bilməyiblər. Donetsk Xalq Respublikasının Qorlovka və Donetsk şəhərlərində üç mülki şəxs xəsarət alıb, Kursk vilayətində isə daha bir mülki şəxsin yaralandığı bildirilib”.
Onun sözlərinə görə, son yeddi gün ərzində Ukrayna qüvvələri Rusiya ərazisinə 4300 mərmi atıb.
İzmedia.az
