Türkiyə Dəniz Tədqiqatları Fondunun prezidenti və İstanbul Universitetinin professoru Bayram Öztürk Mərmərə dənizinin çirkab suları ilə çirklənməsi səbəbindən yaxın gələcəkdə tamamilə məhv ola biləcəyi barədə xəbərdarlıq edib.
“T24” qəzetinin məlumatına görə, alim Mərmərə bölgəsindəki təmizləyici qurğuların yalnız 50%-nin işlək vəziyyətdə olduğunu, qalan çirkab sularının isə lazımi səviyyədə təmizlənmədən dənizə axıdıldığını bildirib. Bu vəziyyət dənizdə oksigen çatışmazlığını kəskinləşdirərək ekosistemi sıradan çıxarır. Dənizin xilası üçün ümummilli səfərbərliyin vacibliyini qeyd edən Öztürk, təmizlənməmiş məişət və sənaye tullantılarının dənizə daxil olmasının dərhal qarşısının alınmasını tələb edib.
Öztürk regionun digər dənizlərindəki ekoloji problemlərə də diqqət çəkib:
-
Qara dəniz: Türkiyə balıqçılığının əsas mənbəyi sayılan dənizdə həddindən artıq balıq ovu və çirklənmə səbəbindən balıq ehtiyatları azalır. Dəniz suyu sürətlə qızaraq Aralıq dənizinin iqlim xüsusiyyətlərini almağa başlayır.
-
Egey dənizi: Gökçeada və Samotrak adaları arasında ən böyük mərcan meşələrindən birinin kəşf edildiyini deyən alim, Türkiyə və Yunanıstana bu əraziləri birgə qorumağı təklif edib.
-
Aralıq dənizi: Son 50 ildə suyun temperaturunun 1,5 dərəcə artması mərcanların ağarmasına və invaziv balıq növlərinin yayılmasına səbəb olur. Bundan əlavə, Antalya sahillərində plastik tullantıların artması turizm sektoru üçün ciddi risk yaradır.
İzmedia.az
