Birləşmiş Ştatların öz hərbi kontingentini İraqdan tamamilə çıxarmasından sonra İran tərəfindən dəstəklənən regional qüvvələr və onların müttəfiqləri bu addımı böyük bayram kimi qarşılayıblar. Uzun illər ərzində ABŞ və İran arasında əsas qarşıdurma poliqonuna çevrilən İraqda amerikalıların gedişi güc balansını dəyişib. Qeyd edək ki, ABŞ Prezidenti Donald Trampın fevral ayında İrana qarşı başlatdığı hərbi əməliyyatlar zamanı həlak olan 18 amerikalı hərbçidən 7-si məhz İraq ərazisində həyatını itirib.
Bağdadlı siyasi analitik Əhməd Yunis bildirib ki, Qərb hərbi varlığının sona çatması İran yönümlü silahlı qrupların ölkədəki nüfuzunu kəskin artıracaq: “Bu qüvvələr dövlət siyasətinin formalaşdırılmasında və dövlətin əsas idarəetmə institutlarında mövqelərini möhkəmləndirmək üçün rolunu daha da genişləndirməyə cəhd edəcəklər”.
İran tərəfindən dəstəklənən “İraq İslam Müqaviməti” daxilindəki qruplaşmalar qoşunların çıxarılmasını “tarixi zəfər” kimi dəyərləndiriblər. Təşkilatın komandiri Əbu Müctəba əl-Yasiri bu hadisəni müqavimət qüvvələrinin qələbəsi və ABŞ-ın regiondakı layihəsinin ciddi məğlubiyyəti kimi xarakterizə edib. Xatırladaq ki, ABŞ-ın 2003-cü ildə Səddam Hüseyn rejimini devirməsindən bu yana başlayan münaqişələrdə 200 mindən çox mülki İraq vətəndaşı və təxminən 4500 amerikalı əsgər həlak olub.
İzmedia.az
