İzmedia.az xəbər verir ki, Polşanın cənubunda yerləşən İvkov qminasının sakinləri evlərin yaxınlığında kollara bağlanmış üç ağ aerostat səbəbindən təşvişə düşüblər. Qara plyonkaya bükülmüş paketlərin içərisində yerli aksiz markası olmayan siqaretlər aşkarlanıb və Varşava bu hadisədə Belarus izinin ola biləcəyini istisna etməyib.
Hadisə yerinə gələn polis, yanğınsöndürənlər və pirotexniklər yaşayış ərazisini mühasirəyə alıblar. İlkin olaraq bu obyektlərin meteoroloji zond olduğu ehtimal edilib. Şarlar evlərdən bir neçə metr aralıda kollara ilişib qalıb və hər birinə qara folqa ilə sarınmış iki paket bağlanıb.
Mütəxəssislər tərəfindən aparılan yoxlamadan sonra partlayış və ya digər təhlükənin olmadığı müəyyən edilib. Lakin hüquq-mühafizə orqanları paketlərin içində Polşa aksiz markası olmayan siqaret blokları aşkar ediblər. Yerli hakimiyyət bu məhsulların qonşu Belarusda istehsal olunduğunu bildirir.
Polis nümayəndəsi Tomaş Krupa vətəndaşlara belə obyektlərə yaxınlaşmamağı tövsiyə edərək onların qaçaqmalçılıq vasitəsi kimi istifadə oluna biləcəyini qeyd edib. Bildirilir ki, bu cür aerostatların ölkənin bu qədər cənubuna çatması ilk haldır — Belarus sərhədinə məsafə 250–300 km təşkil edir ki, bu da hüquq-mühafizə orqanlarını təəccübləndirib.
Hazırda bütün siqaretlər müsadirə olunub, onların uçuş marşrutu və göndərən şəxslər müəyyən edilməyə çalışılır. Qeyd olunur ki, əvvəllər belə qaçaqmalçı şarlar daha çox Polşanın şərq və şimal bölgələrində aşkarlanırdı. Oxşar problem Litvada da müşahidə olunur, hətta bəzi hallarda Vilnüs hava limanının fəaliyyəti müvəqqəti dayandırılıb.
Rəsmilər hələlik geniş açıqlama verməyib, lakin sakinlərə havadan düşən şübhəli əşyalardan uzaq durmaq və belə hallar barədə dərhal polisə məlumat vermək tövsiyə olunur.
