izmedia.az xəbər verir ki, Moldovanın cənubunda yerləşən Qaqauziya muxtar bölgəsi öz xalq məclisi seçkilərini daxili qaydalar əsasında keçirmək hüququnu qoruyub saxlayıb.
Qanunverici orqanın sədr vəzifəsini icra edən Nikolay Ormanji bildirib ki, Kişinyovla aparılan danışıqlar nəticəsində əsas səlahiyyətlər Qaqauziyanın əlində qalmağa davam edəcək.
Məlumata görə, seçki orqanının tərkibinin formalaşdırılması və seçki tarixinin müəyyən edilməsi səlahiyyəti yenə də muxtar parlamentə məxsus olacaq. Hazırda tərəflər arasında mövcud olan ziddiyyətlərin aradan qaldırılması üçün “birdəfəlik razılaşma” üzərində iş aparılır.
Ormanji qeyd edib ki, Qaqauziyanın Mərkəzi Seçki Komissiyasının tərkibini müəyyən etmək və seçki tarixini təyin etmək hüququnun saxlanılması bölgə üçün mühüm əhəmiyyət daşıyır.
Qeyd olunur ki, bundan əvvəl seçkilərin keçirilməsi Moldovanın Ədliyyə Nazirliyinin müraciəti səbəbilə Konstitusiya Məhkəməsinə göndərilmiş və prosesdə gecikmə yaşanmışdı. Daha sonra isə muxtar parlament yeni seçki komissiyasını təsdiqləyərək səsvermə üçün yeni tarix müəyyən edib.
Moldova hökuməti ilə Qaqauziya arasında gərginlik davam edir. Bölgənin ənənəvi olaraq Rusiya ilə əməkdaşlığa daha yaxın mövqedə olması, Kişinyovun isə Avropa İttifaqına inteqrasiya kursu regionda siyasi ziddiyyətləri artırır.
