İzmedia.az xəbər verir ki, Çin Xalq Azadlıq Ordusunun rəsmi orqanı olan hərbi nəşr keçmiş müdafiə nazirləri Vey Fenxe və Li Şanfuya verilən ölüm hökmlərini “qanuni və ədalətli qərar” kimi qiymətləndirib.
Məlumata görə, nəşrdə qeyd olunub ki, yüksək vəzifəli məmurların korrupsiyaya görə cəzalandırılması ordu daxilində ciddi xəbərdarlıq siqnalıdır və bu, hərbi strukturlarda şəffaflığın artırılmasına yönəlib.
Çin hərbi mediası bildirib ki, belə sərt tədbirlər korrupsionerlərə qarşı “heç bir mərhəmətin olmayacağını” göstərir və bu, bütün hərbi iyerarxiya üçün çəkindirici nümunədir.
Qeyd olunur ki, “Jiefangjun Bao” qəzetində yayımlanan məqalədə keçmiş müdafiə nazirlərinin dövlət və partiya ideallarına xəyanət etdiyi, vəzifə səlahiyyətlərindən şəxsi mənfəət üçün istifadə etdiyi vurğulanıb.
Məqalədə həmçinin onların hərəkətlərinin orduya və dövlət nüfuzuna ciddi zərər vurduğu qeyd edilir və verilən cəzaların “qaçılmaz nəticə” olduğu bildirilir.
Analitiklərin fikrincə, bu bəyanat Çində korrupsiyaya qarşı genişmiqyaslı kampaniyanın bir hissəsidir. Rəsmi Pekin isə bildirir ki, yüksək vəzifə və keçmiş xidmət heç kəsi məsuliyyətdən azad etmir.
Vey Fenxe və Li Şanfu müxtəlif dövrlərdə Çinin müdafiə naziri vəzifəsini tutublar. Onlar iri məbləğdə rüşvət alma, vəzifə səlahiyyətlərindən sui-istifadə və dövlət təhlükəsizliyinə zərər vurmaqda təqsirli biliniblər və hökmləri ölkənin Ali Xalq Məhkəməsi tərəfindən təsdiqlənib.
