izmedia.az xəbər verir ki, ABŞ Müdafiə Nazirliyinin (Pentaqon) Maliyyə İşlərinə Cavabdeh nazir müavini Jules J. Hurst III ABŞ–İsrail–İran müharibəsinin indiyədək ABŞ büdcəsinə təsir edən xərclərinin təxminən 29 milyard dollara çatdığını bildirib.
Hurst ABŞ Konqresinin Nümayəndələr Palatasında keçirilən dinləmələrdə çıxışı zamanı qeyd edib ki, bu rəqəm əvvəl 25 milyard dollar olaraq qiymətləndirilsə də, yenilənmiş hesablamalara əsasən artıq 29 milyard dollara yaxınlaşıb.
Onun sözlərinə görə, xərclərin artmasına səbəb hərbi texnikanın təmiri və yenilənməsi, həmçinin hərbi personalın əməliyyatlarda saxlanılması ilə bağlı əlavə xərclərdir.
Müdafiə Nazirliyindən əlavə açıqlama
ABŞ Müdafiə naziri Pit Heqset isə bildirib ki, İranla bağlı əməliyyatlar barədə Konqresə məlumat verilməsi davam etdiriləcək və vəziyyətə uyğun olaraq məlumatlar paylaşılacaq.
O həmçinin qeyd edib ki, ABŞ-ın regiondakı hərbi strategiyasında həm eskalasiyanı artırmaq, həm də lazım gəldikdə qüvvələri geri çəkmək planları mövcuddur.
Xərclər daha da arta bilər
ABŞ mediasında yayılan məlumatlara görə, İranın raket hücumları nəticəsində ABŞ bazalarında yaranan zərərin bərpası da nəzərə alınarsa, ümumi xərclərin 40–50 milyard dollara qədər yüksələ biləcəyi ehtimal edilir.
Əvvəlki hesabatlarda bu əməliyyatın dəyəri 25 milyard dollar kimi göstərilmişdi.
“Əməliyyat adı dəyişə bilər”
Məlumatlara görə, Pentaqon İranla mümkün yeni hərbi əməliyyat baş verərsə, mövcud əməliyyatın adını dəyişdirməyi nəzərdən keçirir. Təklif olunan yeni ad “Çəkic” (Sledgehammer) ola bilər.
Bildirilir ki, “Epik Qəzəb” adlı əməliyyat artıq rəsmi olaraq başa çatmış hesab edilsə də, vəziyyət yenidən gərginləşərsə yeni hərbi planların tətbiqi mümkündür.
Qeyd olunur ki, ABŞ qanunlarına əsasən, 60 gündən artıq davam edən hərbi əməliyyatlar Konqresə bildirilməli və lazım gələrsə, təsdiq alınmalıdır.
