Roma Papası XIV Lev Barselonada yerləşən məşhur Sagrada Familia bazilikasının mərkəzi İsa Məsih qülləsinin təqdis mərasimini həyata keçirib. Tədbir memar Antonio Qaudinin vəfatının 100 illiyi münasibətilə təşkil olunub və minlərlə insanın iştirakı ilə baş tutub.
Yeni təqdis edilən qüllənin hündürlüyü 172,5 metr təşkil edir. Bu göstərici ilə Sagrada Familia dünyanın ən hündür kilsəsi hesab olunur və Avropanın ənənəvi kilsələrini geridə qoyur.
Mərasimdə İspaniya kralı VI Felipe, kraliça Letisiya, baş nazir Pedro Sançes və Kataloniya hökumətinin rəhbəri Salvador İlya da iştirak ediblər. Rəsmi məlumatlara görə, bazilika daxilində və ətrafında keçirilən tədbirləri təxminən 140 min nəfər izləyib.
Papa çıxışında bildirib ki, məbədin memarlıq əzəməti rekord qırmaq üçün deyil, Kataloniya xalqı üçün mənəvi bir simvol olmaq məqsədi daşıyır.
1882-ci ildə tikintisinə başlanılan Sagrada Familia bazilikasının inşası hələ də davam edir. Axşam saatlarında isə məbədin üzərində işıq və musiqi şousu nümayiş etdirilib, dronlarla səmada Antonio Qaudinin portreti və onun məşhur “Əvvəl sevgi, sonra texnika” ifadəsi canlandırılıb.
