Çərşənbə axşamı beynəlxalq əmtəə birjalarında misin qiyməti ABŞ-dən kənarda metal tədarükünün kəskin azalması və mümkün gömrük tarifləri fonunda növbəti dəfə tarixi maksimumunu yeniləyib.
London Metal Birjasında (LME) üç aylıq mis fyuçersləri 1 ton üçün 14.617 dollara yüksələrək ötən gün qeydə alınmış rekord göstəricini geridə qoyub. İlin əvvəlindən bəri LME-də misin dəyəri 16%-dən çox artıb. Şanxay Fyuçers Birjasında (SHFE) isə ən aktiv ticarət olunan mis müqaviləsi 1,3% bahalaşaraq ton üçün 110.620 yuana (təxminən 16.484 dollar) çatıb və yanvarın 30-dan bəri ən yüksək göstəriciyə (110.890 yuan) yaxınlaşıb.
Bazar analitikləri qiymət artımının əsas drayverləri kimi aşağıdakı faktorları göstərirlər:
-
ABŞ tarifləri və logistik axının dəyişməsi: Vaşinqtonun rafinə edilmiş mis idxalına yeni tariflər tətbiq edəcəyi gözləntiləri fonunda treyderlər və idxalçılar iri həcmdə metalı ABŞ anbarlarına (COMEX) daşımağa tələsirlər. Bu hal London birjasındakı ehtiyatların sürətlə tükənməsinə və Amerika xaricində kəskin fiziki qıtlığa yol açıb.
-
Mədən hasilatında durğunluq və struktur tələbatı: Çili və digər aparıcı istehsalçılarda hasilatın azalması fonunda, süni intellekt (AI) məlumat mərkəzləri, bərpaolunan enerji şəbəkələri və elektromobil sektoru tərəfindən misə olan uzunmüddətli tələbat qiymətlərin yüksək səviyyədə qalmasını dəstəkləyir.
İzmedia.az
